ಸ್ಪೊಕೇನ್ ಸಮೀಪದ ಕಾಡ್ಗಿಚ್ಚು: 600 ಕಟ್ಟಡಗಳು ಭಸ್ಮ, ದೊಡ್ಡ ಪ್ರಮಾಣದಲ್ಲಿ ಜನ ಸುರಕ್ಷಿತ ಸ್ಥಳಗಳಿಗೆ ರವಾನೆ

ವಾಷಿಂಗ್ಟನ್ ರಾಜ್ಯದ ಪೂರ್ವ ಭಾಗದಲ್ಲಿ ಕಾಣಿಸಿಕೊಂಡ ಕಾಡ್ಗಿಚ್ಚಿನಿಂದಾಗಿ ಭಾನುವಾರ ಸ್ಪೊಕೇನ್ ಪ್ರದೇಶದ 60,000 ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲಾಯಿತು. ಅಲ್ಲದೆ ಕನಿಷ್ಠ 600 ಮನೆಗಳು, ವ್ಯಾಪಾರ ಮಳಿಗೆಗಳು ಮತ್ತು ಇತರ ಕಟ್ಟಡಗಳು ಬೆಂಕಿಗೆ ಆಹುತಿಯಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ರಾಜ್ಯದ ಎರಡನೇ ಅತಿ ದೊಡ್ಡ ನಗರವಾದ ಸ್ಪೊಕೇನ್ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವಾರಾಂತ್ಯದಲ್ಲಿ ಸುಮಾರು 8.2 ಚದರ ಮೈಲಿ ಅಂದರೆ ಸರಿಸುಮಾರು 21 ಚದರ ಕಿಲೋಮೀಟರ್ ಪ್ರದೇಶದಲ್ಲಿ ಬೆಂಕಿ ವ್ಯಾಪಿಸಿದೆ. ಯುಎಸ್‌ನ ಪಶ್ಚಿಮ ಭಾಗದಾದ್ಯಂತ ಹರಡಿರುವ ಹತ್ತಾರು ಕಾಡ್ಗಿಚ್ಚುಗಳಲ್ಲಿ ಇವುಗಳೂ ಸೇರಿವೆ. ಇದು ಫೆಡರಲ್, ರಾಜ್ಯ ಮತ್ತು ಸ್ಥಳೀಯ ಏಜೆನ್ಸಿಗಳ ಬೆಂಕಿ ನಂದಿಸುವ ಸಾಮರ್ಥ್ಯವನ್ನು ಪರೀಕ್ಷೆಗೆ ಒಡ್ಡಿದೆ ಎಂದು ಅಸೋಸಿಯೇಟೆಡ್ ಪ್ರೆಸ್ (AP) ವರದಿ ಮಾಡಿದೆ.

ವಾಷಿಂಗ್ಟನ್ ರಾಜ್ಯದಾದ್ಯಂತ ಒಟ್ಟು ಸುಮಾರು 390 ಚದರ ಮೈಲಿ ಅಂದರೆ 1,000 ಚದರ ಕಿಲೋಮೀಟರ್ ಪ್ರದೇಶ ಸುಟ್ಟುಹೋಗಿದೆ. ಸ್ಪೊಕೇನ್ ಪ್ರದೇಶದಲ್ಲಿರುವ ಬೆಂಕಿ ಸೇರಿದಂತೆ ಕೆಲವು ಬೆಂಕಿಗಳನ್ನು ಇನ್ನೂ ನಿಯಂತ್ರಣಕ್ಕೆ ತರಲಾಗಿಲ್ಲ. ಇದು ರಕ್ಷಣಾ ಕಾರ್ಯಾಚರಣೆಯ ಆರಂಭಿಕ ಹಂತವಾಗಿದ್ದರೂ, ಯಾವುದೇ ಗಾಯಗಳು ಅಥವಾ ನಾಪತ್ತೆಯಾದವರ ಬಗ್ಗೆ ವರದಿಯಾಗಿಲ್ಲ ಎಂದು ಅಗ್ನಿಶಾಮಕ ಮತ್ತು ಕಾನೂನು ಜಾರಿ ಅಧಿಕಾರಿಗಳು ತಿಳಿಸಿದ್ದಾರೆ. ಸ್ಪೊಕೇನ್‌ನಲ್ಲಿ ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಿದವರಲ್ಲಿ ಯುಎಸ್ ವೆಟರನ್ಸ್ ಅಫೇರ್ಸ್ ಆಸ್ಪತ್ರೆಯ ರೋಗಿಗಳು ಸಹ ಸೇರಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಸ್ಪೊಕೇನ್ ಪ್ರದೇಶದ ವೀಡಿಯೊಗಳಲ್ಲಿ ಕಟ್ಟಡಗಳು ಉರಿಯುತ್ತಿರುವುದು, ನೆರೆಹೊರೆಯಲ್ಲಿ ಕಪ್ಪು ಹೊಗೆ ಆವರಿಸುತ್ತಿರುವುದು ಮತ್ತು ಕೇವಲ ಹೊಗೆಯುಗುಳುವ ಚಿಮಣಿಗಳು ಮಾತ್ರ ಉಳಿದಿರುವ ಮನೆಗಳ ದೃಶ್ಯಗಳು ಕಂಡುಬಂದಿವೆ. ಹವಾಮಾನವು ಮುಂಬರುವ ದಿನಗಳಲ್ಲಿ ಒಣಹವೆಯಾಗಿ ಮುಂದುವರಿಯುವ ನಿರೀಕ್ಷೆಯಿರುವುದರಿಂದ, ಈ ಪ್ರದೇಶದಲ್ಲಿ ಸದ್ಯಕ್ಕೆ ಯಾವುದೇ ರಿಲೀಫ್ ಸಿಗುವ ಲಕ್ಷಣಗಳಿಲ್ಲ ಎಂದು ಹಲವು ಅಧಿಕಾರಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ. ಸ್ಪೊಕೇನ್‌ನಲ್ಲಿ ಫೆಡರಲ್, ರಾಜ್ಯ ಮತ್ತು ಸ್ಥಳೀಯ ಅಧಿಕಾರಿಗಳೊಂದಿಗೆ ನಡೆದ ಪ್ರೆಸ್ ಕಾನ್ಫರೆನ್ಸ್‌ನಲ್ಲಿ ಯುಎಸ್ ಸೆನೆಟರ್ ಮಾರಿಯಾ ಕ್ಯಾಂಟ್‌ವೆಲ್, “ನಾವು ಇನ್ನೂ ಅಪಾಯದಿಂದ ಹೊರಬಂದಿಲ್ಲ. ಮುಂದಿನ ಕೆಲ ದಿನಗಳು ಸವಾಲಿನಿಂದ ಕೂಡಿರುತ್ತವೆ” ಎಂದು ಹೇಳಿದರು. ಬೆಂಕಿ ಹೇಗೆ ಹತ್ತಿಕೊಂಡಿತು ಎಂಬುದನ್ನು ತನಿಖಾಧಿಕಾರಿಗಳು ಇನ್ನೂ ಪತ್ತೆಹಚ್ಚಿಲ್ಲ.

ಬೆಂಕಿಯನ್ನು ನಿಯಂತ್ರಿಸಲು ಹೆಣಗಾಡುತ್ತಿರುವ ಏಕೈಕ ಸ್ಥಳ ಸ್ಪೊಕೇನ್ ಅಲ್ಲ. ಪಶ್ಚಿಮ ಇಡಾಹೊ ಮತ್ತು ಪೂರ್ವ ಒರೆಗಾನ್‌ನಲ್ಲಿ ಸುಮಾರು 525 ಚದರ ಮೈಲಿ ಅಂದರೆ ಸುಮಾರು 1,360 ಚದರ ಕಿಲೋಮೀಟರ್ ಪ್ರದೇಶದ ಹುಲ್ಲುಗಾವಲನ್ನು ಸುಟ್ಟುಹಾಕಿರುವ ಬೆಂಕಿಯನ್ನು ನಂದಿಸಲು ಸಿಬ್ಬಂದಿ ಬುಲ್ಡೋಜರ್‌ಗಳು ಮತ್ತು ಹೆಲಿಕಾಪ್ಟರ್‌ಗಳನ್ನು ಬಳಸಿ 10 ನೇ ದಿನವೂ ಕಾರ್ಯಾಚರಣೆ ಮುಂದುವರೆಸಿದ್ದಾರೆ. ಈ ಪ್ರದೇಶವು ಜಾನುವಾರು ಫಾರ್ಮ್‌ಗಳಿಗೆ ಹೆಸರುವಾಸಿಯಾಗಿದೆ. ಬೆಂಕಿಯು 600 ಕ್ಕೂ ಹೆಚ್ಚು ಮನೆಗಳು ಮತ್ತು 800 ಇತರ ಕಟ್ಟಡಗಳಿಗೆ ಅಪಾಯವನ್ನುಂಟುಮಾಡುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಈ ಪ್ರದೇಶದಲ್ಲಿ ವಾರದ ಬಹುಭಾಗ ಬಿಸಿಲು ಮತ್ತು ಒಣಹವೆ ಮುಂದುವರಿಯುವ ನಿರೀಕ್ಷೆಯಿದ್ದು, ಬುಧವಾರದ ವೇಳೆಗೆ ತಾಪಮಾನವು 90 ಡಿಗ್ರಿ ಫಾರನ್‌ಹೀಟ್ ಅಂದರೆ 32 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಾಗಲಿದೆ. ಆ ಬೆಂಕಿಯು ಸಿಡಿಲು ಬಡಿದು ಸಂಭವಿಸಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಮಧ್ಯ ಉತಾಹ್‌ನಲ್ಲಿ, ವಾರಾಂತ್ಯದಲ್ಲಿ ದೊಡ್ಡ ಪ್ರಮಾಣದ ಕಾಡ್ಗಿಚ್ಚು ದ್ವಿಗುಣಗೊಂಡಿದ್ದು, ಭಾನುವಾರ ಬೆಳಗಿನ ವೇಳೆಗೆ 16 ಚದರ ಮೈಲಿಯಿಂದ ಸುಮಾರು 56 ಚದರ ಮೈಲಿಗೆ ವ್ಯಾಪಿಸಿದೆ. ಸ್ಥಳೀಯ ಕಾನೂನು ಜಾರಿ ಸಂಸ್ಥೆಯ ಪ್ರಕಾರ 100 ಕ್ಕೂ ಹೆಚ್ಚು ಜಾನುವಾರುಗಳು ಸಾವನ್ನಪ್ಪಿವೆ. ಭಾರೀ ಗಾಳಿಯು ರಾತ್ರೋರಾತ್ರಿ ಬೆಂಕಿ ನಿಯಂತ್ರಣ ರೇಖೆಗಳನ್ನು ದಾಟಲು ಸಹಾಯ ಮಾಡಿದ್ದರಿಂದ ಅಧಿಕಾರಿಗಳು ಈ ಬೆಂಕಿಯನ್ನು “ವಿನಾಶಕಾರಿ” ಎಂದು ಕರೆದಿದ್ದಾರೆ. ಬೆಂಕಿಯು ಸುಮಾರು 2,600 ಜನಸಂಖ್ಯೆಯನ್ನು ಹೊಂದಿರುವ ಮತ್ತು ಮಿಲಾರ್ಡ್ ಕೌಂಟಿಯ ಕೇಂದ್ರವಾಗಿರುವ ಫಿಲ್ಮೋರ್ ಕಡೆಗೆ ಉತ್ತರಕ್ಕೆ ಚಲಿಸುತ್ತಿದೆ. ಫಿಲ್ಮೋರ್‌ನ ದಕ್ಷಿಣ ಭಾಗಕ್ಕೆ ಭಾನುವಾರ ಸಂಜೆ ಕಡ್ಡಾಯ ಸ್ಥಳಾಂತರಕ್ಕೆ ಆದೇಶಿಸಲಾಗಿದೆ.

ವಾಷಿಂಗ್ಟನ್ ಗವರ್ನರ್ ಅವರು ಕಾಡ್ಗಿಚ್ಚಿನ ಬಗ್ಗೆ ಫೆಡರಲ್ ಅಧಿಕಾರಿಗಳೊಂದಿಗೆ ಮಾತನಾಡಿದ್ದೇನೆ ಎಂದು ಹೇಳಿದರು.