ಯೂಟ್ಯೂಬ್ ಯಶಸ್ಸಿನ ಬೆನ್ನಲ್ಲೇ ಮುಂಬೈನಲ್ಲಿ ಮತ್ತೊಂದು ವಿಲ್ಲಾ ಖರೀದಿಸಿದ ಅರ್ಚನಾ ಪೂರನ್ ಸಿಂಗ್ ಕುಟುಂಬ

ನಟಿ ಹಾಗೂ ಟೆಲಿವಿಷನ್ ತಾರೆ ಅರ್ಚನಾ ಪೂರನ್ ಸಿಂಗ್ ಅವರ ಕುಟುಂಬವು ಮುಂಬೈನಲ್ಲಿ ಮತ್ತೊಂದು ವಿಲ್ಲಾವನ್ನು ಖರೀದಿಸಿದೆ. ತಮ್ಮ ಯೂಟ್ಯೂಬ್ ಚಾನೆಲ್‌ಗಳಿಂದ ಬಂದಿರುವ ದಾಖಲೆ ಮಟ್ಟದ ಗಳಿಕೆಯಿಂದಲೇ ಈ ಆಸ್ತಿ ಖರೀದಿಸಲಾಗಿದೆ ಎಂದು 'ದಿ ಇಂಡಿಯನ್ ಎಕ್ಸ್‌ಪ್ರೆಸ್' ವರದಿ ಮಾಡಿದೆ. ಈ ಹೊಸ ಖರೀದಿಯೊಂದಿಗೆ ಮುಂಬೈನಲ್ಲಿ ಅವರ ಒಡೆತನದಲ್ಲಿರುವ ಆಸ್ತಿಗಳ ಪಟ್ಟಿ ಮತ್ತಷ್ಟು ವಿಸ್ತಾರಗೊಂಡಿದ್ದು, ಡಿಜಿಟಲ್ ಆದಾಯವು ಹಿಂದೆಂದಿಗಿಂತಲೂ ಹೆಚ್ಚು ಎತ್ತರಕ್ಕೇರಿದೆ ಎಂಬುದನ್ನು ಇದು ತೋರಿಸಿಕೊಟ್ಟಿದೆ.

ಸಿಂಗ್, ಅವರ ಪತಿ ಪರ್ಮೀತ್ ಸೇಥಿ ಹಾಗೂ ಪುತ್ರರಾದ ಆಯುಷ್ಮಾನ್ ಮತ್ತು ಆರ್ಯಮಾನ್ ಒಳಗೊಂಡಿರುವ ಈ ಕುಟುಂಬದ ಡಿಜಿಟಲ್ ಕಂಟೆಂಟ್ ವೀಕ್ಷಕರ ಸಂಖ್ಯೆಯನ್ನು ದಿನೇ ದಿನೇ ಹೆಚ್ಚಿಸಿಕೊಳ್ಳುತ್ತಿದೆ. ವರದಿಯ ಪ್ರಕಾರ, ಈ ಚಾನೆಲ್‌ಗಳು ಆರಂಭವಾದಾಗಿನಿಂದ ಇಲ್ಲಿವರೆಗೆ ಕಾಣದಷ್ಟು ಹೆಚ್ಚಿನ ಆದಾಯವನ್ನು ಪ್ರಸ್ತುತ ಗಳಿಸುತ್ತಿದ್ದು, ಈ ಹಣದಿಂದಲೇ ಹೊಸ ರಿಯಲ್ ಎಸ್ಟೇಟ್ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಈ ಕುಟುಂಬವು ನಿಯಮಿತವಾಗಿ ವ್ಲಾಗ್‌ಗಳು, ಕಾಮಿಡಿ ಸ್ಕೆಚ್‌ಗಳು ಮತ್ತು ತಮ್ಮ ದೈನಂದಿನ ಜೀವನದ ಇಣುಕು ನೋಟಗಳನ್ನು ಶೇರ್ ಮಾಡುತ್ತ ಬಂದಿದ್ದು, ದೊಡ್ಡ ಪ್ರಮಾಣದ ಚಂದಾದಾರರನ್ನು (ಸಬ್‌ಸ್ಕ್ರೈಬರ್‌ಗಳನ್ನು) ಸಂಪಾದಿಸಿದೆ. ಈಗ ಇದೇ ಆದಾಯವು ಹೊಸ ವಿಲ್ಲಾ ಖರೀದಿಗೆ ಬಂಡವಾಳವಾಗಿದೆ.

ಹಿಂದಿ ಸಿನಿಮಾದ ಹಿರಿಯ ನಟಿಯಾಗಿ ಹಾಗೂ ದಿ ಕಪಿಲ್ ಶರ್ಮಾ ಶೋ ನಂತಹ ಜನಪ್ರಿಯ ಕಾಮಿಡಿ ಶೋಗಳ ಮೂಲಕ ದೀರ್ಘಕಾಲದಿಂದ ಗುರುತಿಸಿಕೊಂಡಿರುವ ಸಿಂಗ್, ಇತ್ತೀಚಿನ ವರ್ಷಗಳಲ್ಲಿ ತಮ್ಮ ಜನಪ್ರಿಯತೆಯನ್ನು ಯೂಟ್ಯೂಬ್‌ ಕಡೆಗೂ ವಿಸ್ತರಿಸಿಕೊಂಡಿದ್ದಾರೆ. ನೇರವಾಗಿ ಪ್ರೇಕ್ಷಕರನ್ನು ತಲುಪುವ ಈ ಮಾಧ್ಯಮದ ಮೂಲಕ ಸ್ವತಂತ್ರವಾಗಿ ಆದಾಯ ಗಳಿಸುತ್ತಿರುವ ಹಿರಿಯ ಮನರಂಜನಾ ಕಲಾವಿದರ ಹೊಸ ಟ್ರೆಂಡ್‌ಗೆ ಇದು ಕನ್ನಡಿ ಹಿಡಿಯುತ್ತದೆ. ಸಿಂಗ್-ಸೇಥಿ ಕುಟುಂಬಕ್ಕೆ ಈ ಸ್ಟ್ರಾಟೆಜಿಯಿಂದಾಗಿ, ಭಾರತದ ಅತ್ಯಂತ ದುಬಾರಿ ರಿಯಲ್ ಎಸ್ಟೇಟ್ ಮಾರುಕಟ್ಟೆಗಳಲ್ಲಿ ಒಂದರಲ್ಲಿ ಹಲವು ವಸತಿ ಆಸ್ತಿಗಳನ್ನು ಹೊಂದಲು ಸಾಧ್ಯವಾಗಿದೆ.

ಹೊಸದಾಗಿ ಖರೀದಿಸಲಾದ ವಿಲ್ಲಾದ ನಿಖರವಾದ ಸ್ಥಳ, ವಿಸ್ತೀರ್ಣ ಅಥವಾ ಅದರ ಮೌಲ್ಯದ ವಿವರಗಳನ್ನು ವರದಿಯಲ್ಲಿ ಬಹಿರಂಗಪಡಿಸಲಾಗಿಲ್ಲ. ತಮ್ಮ ಚಾನೆಲ್‌ಗಳಲ್ಲಿ ಎಂದಿನಂತೆ ಹಂಚಿಕೊಳ್ಳುವ ಕಂಟೆಂಟ್ ಹೊರತುಪಡಿಸಿ, ಈ ಖರೀದಿ ಕುರಿತು ಕುಟುಂಬವು ಬೇರೆ ಯಾವುದೇ ಸಾರ್ವಜನಿಕ ಹೇಳಿಕೆ ನೀಡಿಲ್ಲ.